Na poin lontan, lo group kartyé fransé la bate tanbour akoz li nana in bon santé ékonomik. Konpran par-la, bann kapitalis, zot posh palto i marsh dovan zot si tèlman zot i gingn larzan. Bin, bann plantèr la-dan ? Zot i gard dann in trou. I di azot kont dsi bann z’èd piblik pou pa mor lé dé zié rouvèr, akoz zot prodiksion do sik la pa rantab. Do sik ?

Lé ga, dann kann, na poin arienk do sik ! I gingn fé in takon zafèr avèk sa... Lé vré, mé dopi in sèrtin zour lané 1969, bann plantèr i gingn pi arien dsi sak i apèl bann sou-produi kann. Na in sèrtin sindika, la fédékane-Virapoullé, in sèrtin gouvèrnman, sèt la droit, in sértin dépité té i apèl Debré épi bann zizinié - tousa mèm konplis - la désid vol bann plantèr kann. Pou zot, zéro kalbas déssi tout sak i gingn tir dann kann an plis lo sik.

Alor, lo group kartié fransé i pé shant konm kok - kroir son shanté i fé lèv solèy ! Pétèt li asiz dsi in bransh li l’apré koupé ? Kas pa la tèt, zot la fine prévoir l’afèr : pran gran-gran karo la tèr dann l’afrik pou kontinié zot biznès.
In sipozision : alé fé lo ronm la-ba... Kisa la di : « lo ronm la pa bon mèm » ? Pa pou toulmoun, touléka !

Justin