Kozman-la i tourn otour d’manjé. Sa in kozman dann tan demoun l’avé fain in pé toultan. Aye ! Aye ! Aye ! Kout amoin zot tout, goni vid i tienbo pa d’bout. Isi La Rényon, i prétan nou la soufèr la fain dann tan La guèr trantnèf karant sink kan bann zanglé la désid blok bann bato téi vé rant dann Por La Rényon. Mé sirtou alé pa kroir la fain l’arète l’ané 1945, èl la kontinyé pli tar mèm avèk la loi départman fransé. Pou kosa ? Pars loi-la, in bon loi, dsi désèrtin poinnvizé gouvèrnman la désid aplik sa par shikète. Si parti kominis l’avé pa lité pou sa ébin mi pans zordi ankor la loi l’égalité n’arté pa apliké. Alé ! Mi kite azot roflésh i la dsi é ni artrouv pli d’van. Sipétadyé !