Méssyé, Médam, la sosyété, koze èk mwin sé koz èk in kouyon, mé sé o py d’lo mir k’i oi lo masson. Mézami, mi rapèl kozman-la mwin l antann sa kan mwin lété jenn marmaye ankor. Lo ga la di sa, téi travaye zoinalyé dsi nout bitasyon é konm téi ariv ali souvan défoi, li la bash travaye é kan mon papa la d’mand ali pou kossa, li la répnd sak zot la lir an-o-la. Mwin pèrsonèl étan pti, mwin la trouv lo formil lété valab pars dann tan-la mwin l’avé poin konsyans la valèr sakré lo boulo. Mé l’ fond’lafèr mwin téi koné pa é mwin l’aprann apré si lo boug la bash travaye li la pa bash zanguye dann bassin, manyok dann karo son patron, épi lo pti kabane okipé san péyé. Arzoute èk sa lo bann parti karte bann zoinalyé téi fé lo soir dann la posh-plito dann bitasyon - mon prop papa lété patron bann moun-la. Dopi zour-la mon ladmirasyon pou lo boug la bèss in pé, mé o-fon mwin ti koné li-avèk lé zot - téi travaye dir, alor karote in pé tazantan lété pa si méshan kan mèm é tou konte fé mon papa téi anvé pa d’zote lontan. Alé ! Mi kite azot rofléshi la dsi é ni artrouv pli d’van. Sipétadyé.