Moin la mèm konète in moun té i azout avèk lo ropo, la bone nouritir. I fo dir lo ga té i fé travay dir épi téi gingn pa tro son pourkoi konm k’i fo. I fo dir osi, sa lété dann tan travay la tèr té konm in boulo pou bann forsa… Alon rotourn dsi nout kozman : ala in n’afèr, konm k’i diré, lé lojik san pour san …

Na in moun téi apèl Alphonse Allais téi di konmsa : lo travay lé pa fé pou lo moun, la prèv ? Sa i fatig ali. Konm travay i fatig, travay i iz lo kor é aforstan li lé kapab tyé lo travayèr. Moin lé sir bann doktèr koméla lé riskab ète an kolèr si zot i antan in n’afèr konmsa sirtou dann in pèryod i an mank pa domoun tro gro. Pou pa fash avèk zot mi pé dir sak in vyé kizinyé téi di : « li vé pa manz bonpé mé dé bone shoz ».

Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké rant-rant, ni pé z’ète , tazantan, dakor rantre nou.