Sa in proverb kourt sa ! Konbien pyé ? Sète pyé la pa bézoin plis ; in pyé sé in son si zot i vé. Dann provèrb-la, in mové avèk in bon z’afèr lé asosyé ansanm, inn-a-l’ot. Lo mové, dann l’éspri dmoun, sé lo « lo - sal » ; lo bon sé « angrès koshon » pars avèk lo sal i angrès mé i fé grandi osi, i fé donn lo poi donk la valèr. Astèr dan la vi, kansa in mové z’afèr i pé donn in bon kékshoz ? In travay dir I pé, avèk lo tan, aranz out sityasion, si ou I viv an fourmi, pa an sigal. Kok zot i anpans ? Arien ditou. Fé travay z’ot koko ! Fé bouy z’ot matyèr griz ! Zot va oir ké, rant-rant, ni pé tazantan éte dakor rantre nou.