Sak son famiy l’avé ib l’élvaz koshon, i koné bien kosa i lé lo sal. Dizon sé bann lo graé-graé, avèk désèrtin z’afèr dodan konm bann morso légime, pome tèr, sansa patate, rouroute osinonsa konflor. Kozman-la, sans prop, ni kon pran sa bien é lé pa bézooin an avoir bak plis vinnsink pou bien konprann ali. Mé néna galman in sans figiré é mi diré mèm sé in foutan vik i parl lo sal é ni pé oir sa konm in kékshoz in pé malonète konm volé, vann la drog, épi fé tout sor z’afèr la moral i kondane. Mé si la moral i kondane, la pa pou sa k’i anrishi pa son onm. In gran mésyé konm Proudhon, in lidéolog fransé, disnévyème syèkl, téi di pa : « La propriyété sé lo vol ! » . Lo vol la pa in n’afèr prop, i pé mèm konpar sa avèk lo sal. Alé ! Mi kite azot rofléshi la dsi é ni artrouv pli d’van sipétadyé.