Souvan dé foi, ou lé a d’mandé pou kosa, sanm pou ou, ou oi pa ou manz in grin d’sèl avèk in moun. Ou i oi pa ou fé in n’afèr, kansréti lo pli pti kékshoz, avèk in moun. Pou kosa, ou vé pa fé mèm in pti bout shomin la vi avèk li ? Ou i pé trouv tout kalité rézon konm na poin mèm z’idé, konm in vyé bataye famiy, konm in kont z’intéré épi d’ot rézon ankor ! Tousa i pé arivé. Tousa lé pétète vré ! Mé demoun lontan la trouv in méyèr rézon. Dizon in rézon d’ fon : lo san i akord pa ! Sa i vé dir lo kraktèr la pa konpatib, konm i di koméla… Moin pèrsonèl, mi soré pa dir azot si mi partaz so l’opinyon la. Pou koué ? Pars in tan ou i oi dé moun lé konm shoushoute avèk la mori, in tan ou i oi zot i bataye konm lo shien avèk lo shat. Poitan lo san inn rant lé dé la pa shanj inn tyork é lo san sé pou la vi. Alor ? Alor zot i pran sa konm zot i vé é ni artrouv pli d’van sipétadyé.