Rotyin byin la dat la, sanm pou mwin Lo 27 séptanm 2015 i pé èt un gran zour pou nou. Avan yèr sint sizann dann nout rèinyon initèr mwin la santi konm inn ti lèr nouvo, inn ti lèr sin. Ou va di “Rant moun rézonab, té falé in zour rotrouv a nou“. Natirèlman nou té i dwa fè nout rotrouvay dann lintéré nout péi. Byin sir néna in diférans rant nou, si ni rokoné pa, ni ramas mantèr èk domoun. Byin sir nou té in pé fashé-fashé, Ki pé di lo kontrèr ? Byin sir ni dwa rann kont nout bann kamarad.

Pou otan ni dwa èt fashé èk la famyi tout la vi ? Konm néna la di laba sint sizann, dovan bann défi i atann a nou, nou na pwin lo shwa, na pi pou may-mayé, na pi lo tan pou pèrd. La di osi, nout linyon sé pa in linyon zis pou lokazyon, zis pou zéléksyon. Dovan 2000 pérsonn, nou la di ni fash pi, nout linyon sé pou vint an. Sépousa mi di lo 27 séptanm 2015 i pé èt in gran dat pou nou. Mwin la santi osi konm si néna bokou réspé rantronou.

Koman Paul té aplodi dimansh ? La arpal lo rol nout parti dann listwar la Rényon, la paz nout bann dirizan la ékri. Ni koné, néna i vé aras la paz mé aras la paz i sifi pa vik sé nou ki ékri lo liv, pou pi parl dé nou fo fé disparèt lo liv. Dopi dimansh 27, néna la désid ékri in bout lo liv èk nou. Ni éskli pa pérsonn, vidaman ni komans par réini nout famyi, aprésa nout zami, aprésa lé zot. Lé pli fasil komans par la famyi, bann vié gramoun i di “Lo san i koz“