Anon agard in pé d’tan déyèr nou, nou va oir koman lo bann mo, lo bann z’idé, lo bann z’opignon la shanjé. Pran solman vinn-sinq, trant-an an aryèr, lo tan in zénérasion dmoun : lo tan in moun i énèt, lo tan li grandi, lo tan son tour li fé zanfan. Si nou lé assé ansien épi si nou na la mémoir, ni rapèl té intèrdi di lo mo péi, lo mo kiltir, lo mo pèp, lo mo patrimoine nora pa été bien vi si téi koz ka dsi pou La Rénion.
Zistoman, ni sort viv bann zourné lo patrimoine. La-ba Hell-bourg la fé in gayar fète, la koz dsi bann noir maron, la rakonte listoir La Rénion, la armète bann maron dann listoir nout péi.
Lé bien in n’ afèr konmsa !
Mé, in sinp z’afèr, in sinp késtion, in sinp romark : zordi sa i pass konm in lèt-a-la post, nana vinn-sink, trant-an, sa noré pa pass konmsa..pétète mèm nora défann fé la fète ? Lé vré dolo la fine koulé sou l’pon. Lé vré in bon pé dmoun la lité épi la lite la mète anou pli d’van.
Bon ! Bin zordi la pa in zour pou plégné : zis pou rann anou kont par nou-mèm, lo sans bann mo i shanj avèk lo tan... i shanj sirtou avèk la lite !

Justin