Oté

Lo sansèr la pa l’invantèr ! Tok ! Pran sa pou ou !

Justin / 6 désanm 2017

JPEG - 43.6 ko

Matante Zélida la ékrir Justin :

Mon shèr nové, mon spès salté, rouj de fon dovan l’étèrnité, alor, zordi zot i an plègn bann z’institisyon i rosoi pi zot pou ète an parmi ; sa lé vré pou konsèye réjyonal, sa lé vré pou bann l’izine sikriyèr, sa lé vré pou madam Bello, pou lo mèr Lo por, étsétéra, la ké lo ra. Moin na in l’ésplikasyon mi pé done azot sé kan ou lé pa d’bone konpagni, i pé pa rosovoir aou an bone konpagni. La prèv , tout bann nom moin la mark an o la. Tok ! Pran sa pou toi.

Justin la fé pou répons :

Mon vyé matant sak ou la di an o la i aport la prèv konm de koi ou nana in sans partikilyé dsi la démokrasi ; si mi konpran aoyu, la démokrasi sé pou lé jans bien. Pou sak ou i pé antann avèk é pa pou sak i vé pa marsh a znou.

Téréos i rosoi pa nou ! Ok ! Mé Téréos i pé pétète rakont anou kosa li la fé avèk lo savoir fèr bann rényoné. In zour moin la ékout in l’émisyon dsi kann é moi la aprann in pé dan tout péi i plant kann invanté La Rényon. Bin, kosa nou la gingn la dan ? Zéro kalbas bien sir ! Alé oir sé bann rényoné la invant désèrtènn bann kann la. La propriyété intéléktyèl bann z’angajé, bann plantèr, bann tésnisien, i fo kroir sa in kont pou la po patat.

Si mi arzout ankor tousa bann z’idé Paul Vergès épi tout son bann z’ékip la donn favèr, tousa i kont pa pou arien ditou sa. Tout lété paré, po tir La Rényon dann malkoté ébin la mèm pa gingn fèr arien ansanm. Si mi arzout ankor tout z’idé nout parti kominis la dévlopé é bin lo bann sansirèr la mèm pa gingn fé arien ansanm.

Konm mi di souvan, lo sansèr la pa l’invantèr. Tok ! Pran sa pou ou !