Mé si ni ékout demoune apré kozé kissoi dann radio kissoi an parmi l’moune i diré pa lintéré zénéral i fé parti d’bann prinssip mazoritèr dann lakssion piblik. Wi antan mèm demoune apré dir shakinn i rode son lintéré é son konvikssion i sava zistoman dann sanss son lintéré privé.

Mi trouv lé domaz lé pa touzour ke l’moune i pran lintéré zénéral konm far pou éklèr la rout lakssion piblik. Mi diré mèm souvan défoi déssèrtin résponsab i assir dsi lo prinssip épi i détourn sa an zot favèr azot. Mi trouv ankor pli domaz ké pou déssèrtin é an parmi bann zadministré sa lé normal é zot i oi sa konm lo méyèr fasson pou azir. I ariv amwin d’antann in pé lé pa loin d’konsidèr sak i rode lintéré zénéral konm in inbéssil pars zot i dévir lo do zot prop intéré.

Astèr lo prinssip lintéré zénéral sa i konpran la téori épi la pratik. Dann la téotrisé lo fondlman lakssion publik, mé sa i anpèsh pa bann kou tordu é opliss i sava opliss ni konstate bann zaktèr piblik i tonb sou lo kou d’violassion lo droi é i déjénèr souvan dann sanss lo profi privé.

Astèr dann in sossyété néo-kolonyalist konm sak ni koné lé pa rar bann zaktèr piblik i rant an plin dann sèrviss lintéré partikilyé bann néo kolonyalist é sé konmsa lo sistèm i prézèrv ali kont tout violassion lo sistèm néokolonyal. Normal vi ké nou lé dann in sossyété néokolonyal é sossyété la i koné défann son zintéré ziska in zour i apèl domin.

A bon antandèr salu !

Justin