Zot i koné Lafrik di sid. Konbien foi pandan konbienn zané nou la antann l’ANC, lo mouvman lo gran Nelson Mandéla zamé i gingn ar pa dann son bann konba konte l’aparteid. Ané apré ané, nou bann militan rényoné nou téi di sé pou sète ané la viktoir mé la viktoir ankor in foi téi poz anou in lapin mé in zour nou l’aprann dann péi Mandéla l’avé mète in poin final avèk l’aparteid é Madiba lété Prézidan la Répiblik. Zot i rapèl l’Algérie é sak l’arivé lané 1962.. Zot i rapèl Lo vietnam é koman li la térass La franss, li la térass Lamérik, épi bann klik réaksyonèr.

Mézami mi arète la avèk inn-dé zégzanpe, toussa pou dir azot in konba lé pa pèrdu d’avanss é mèm si lo bann fors i aparé inégal, lo rézilta a la fin dé fin i fini par ète in bon rézilta… provi ké la métode lé bone é la rézon lé de oute koté. Mi vé anparl la Palestine é konm in bonpé mi panss èl va finir pa gagné. Mi panss galman bannzil Chagos é mwin lé sirésèrtin zot va finir pa gingn lo droi retourn shé zot. Si pa zordi domin. Si pa domin apré.

Justin