Sokrétèr d’ État, Yves Jégo, i sort prézant dovan lo gouvèrnman son plan : pou li, sa lé pou amène bann péi loutremèr in pé plis dann shomin dévlopman... Domaz, sé "son" plan épi la pa "nout" plan, lo plan tou l’moun ansanm, lo gouvèrnman an parmi ! Mi vé pa dir i ansèrv ar pa arien, bann péi loutremèr, mi pé mèm dir va ansèrv anou, solman sak lé sir sé k’si lété "nout" plan, noré ansèrv a nou plis ankor é plis mié.
Akoz la pa nout plan ? Arienk bann zélu, la moitié loutromèr i vé pa an antann parlé, épi la moitié k’i rèst lé a moitié pou sa, vik zot i di : lé pa bon san pour san, nana z’afèr pou rovoir... Akoz sa la spas konm sa ? Pars l’afèr la tourn konm in zé la pongn rant gouvèrnman épi bann z’élu. Inn la di si, l’ot la di la. Lé dé gran zournal i kont lo kou : in kou d’poin tarza, in kou d’pistolé, in klak Fernandella. Konm i di dan la shanson ! Kissa la gingné, kissa la pèrd ? Domaz té, loutremèr, La Rénion an parmi k’lété apré gingn lo kou.
L’afèr té mal améné, épi sé gouvèrnman l’otèr, vik zot la pa bien konprann lo tik-tak lo bann roprézantan La Rénion (pou sak i rogard anou) : sèy mète toute dakor ansanm-avèk pou bien rann sèrvis lo péi. Gouvèrnman la pa konprann sa : lé tèlman sinp, tèlman lé transparan k’li té apré domann ali kèl koté i lé lo pièz.
Zistéman : pièz la poin ! Arienk in ségré : mète tout sak i vé ansèrv lo péi dakor ansanm, lo sèl vré motèr valab.

Justin