Yèr, la mète an sirkilasyon lo kontournman Gran-boi. Moin lé byin kontan pou sak lété pri tou lé zour-shak zour dann l’anboutéyaz. Zot va nyabou fé z’ot parkour in pé pli vite... zot va pèrde moins le tan. Sa lé bon pou zot mèm si sa i rézoude pa bann boblèm la sirkilasyon pou toultanan dann z’ot landroi. Sa la koute soisann-kinz milyon l’ero. Sa larzan sa Baya ! Moin la lir dann nout zournal é moin té fine vi déssi internet, ké toute komine La Rényon la gingn z’ot par dann travay la réjyon, san fé préférans, san agarde ki k’lé a-droite, ki k’lé a-gosh, aryink an portan antansyon déssi sak lé byin néssésèr pou fé.
Pou arvnir déssi la dévyasyon Gran-boi, la fé sa dann in komine lo mèr lé UMP é son l’opinyon politik la pa anpèsh la réjyon fé fèr in travay konsékan komansa. Lé normal ! I mankré pi k’i fé pa konmsa ! Mé zot i kroi toute in bann tète-piosh, tout in bann léspri anklavé a-fors ète séktèr, n’ora fé konmsa, si té zot l’avé pou désidé. Zot na konfyans lo roi martin, sansa lo zoli garson Tampon, sansa d’ote ankor nora azi konm sa zot ?
Moin la konète in tan ousa si out papa té kominis téi done pa ou la bours pou alé fé zétide an Frans, ousa déssèrtin plantèr té i gingn pa larzan déga siklone, parl pi distribisyon zoué... Zot na konfyans lo roi martin Sintandré, ou byin lo zoli garsonn Tampon, sansa d’ote ankor nora fé konmsa ? Moin non, pars konm di lo kont ,lo shat la fine shodé, i krin lo fré !

 Justin