In saz l’ Afrik la di kozman-la é mi pé dir azot, pou vréman, proverb-la I intérèss amoin pou vréman. A komansé pars li lé valab dann tout péi épi tout sosyété mé sa lé valab, an prinsip, pou tout kozman d’sazèss. Dézyèmman pars lo saz i mète lo moun an gard dsi in mové koté lo bann rapor imin dann la sosyété. La n’ote konm tout bann sosyété imène. Si néna in bon léson pou tiré ? Tanmyé… Ou i pé z’ète asiré dann kozman-la i anparl bann shoz lé pa rokomandab konm k’i diré bann déshés : konm ladi - lafé, mové kozman, vilin manyèr, zistoir mantèr épi tout lo tranbleman. Lo saj i di, toulmoun i pé intérèss kékshoz konmsa, mé plizoumoin é la pa toulmoun lé pri ladan konm zoizo dsi la kol. In bonpé, i anvoye sa baladé, i intérèss pa pli k’i anfo, i pran pou la valèr. Mé désèrtin i pran sa o sèryé, zot i pran sa pou la vérité vré épi zot i kolport sa partou. Final de kont zot i artrouv azot mayé d’dan é zot i gingn pi artir azot proproman. Alé ! Mi kite azot rofléshi la dsi é ni artrouv pli d’van. Sipétadyé !