Médam zé Mésyé, la Sosyété, koz èk moin sé koz èk in kouyon mé sé o pyé d’lo mir k’i oi lo mason. Mé zami, dopi lo mond lé mond, demoun la touzour rode in shèf. Pa solman lo moun pars d’apré sak mi koné dann in troupo lion, lo pli for i komannn lo group. Parèye pou in bann lou sovaz, in bann shien, sansa d’ot zanimo ankor. Finalman ni pé dir demoun la kopyé dsi lé z’ot zéspès. Aprésa, lo vilaz li la dmann galman son shèf, la tribu osi, épizapré lo péi la réklam son shèf pou protèz ali, épi pou komann ali, é pou ésploite ali. Lo shèf sé lo shèf é sak i vé bar son shomin nora afèr ali, épi sak i ansèrv ali konm siplétif va donn la min. An démokrasi alor ? Mi lèss azot kalkilé, épi rofléshi la dsi. Aprésa ni rotrouv pli d’van. Sipétadyé.