Mi èm antann in kozman konmsa mé moin lé a d’mandé si li lé vré pou vréman. Sa i fé pans moin kan, dann tan lontan, nou té i sava rod dolo, sansa la boutik. Dann tout kour, dann tout l’alé l’avé lo shien-roké é sa té i aboye vèy pa koman. La pa pars zot té i aboye, ké zot téi mord, mé défoi téi aboy épi téi mord. Mi souvien kan moin lété marmay moin la gingn kék kou d’dan avèk lo shien… Sans prop la pa tro vré sanm pou moin, mé sans figiré mi koné nana demoun nana d’bon arienk la gèl. Zot i ménas mé la pa touzour ké zot i égzékit. Mi pans par kont si in moun i koz pa ditou, i fo méfyé arvaz ali. Konm i di souvan : « Arvaz pa gèp dann son ni ! ». Kosa zot i anpans ? arien ditou ! Fé travay z’ot koko ! Fé bouy z’ot matyèr griz ! zot va oir, ké rant-rant, ni pé z’ète, tazantan, dakor, rantre nou.