Oté

« Lo shien i manz pa tomat, mé li anpèsh poul manzé »

In kozman pou la rout

Justin / 17 zwiyé 2019

JPEG - 43.6 ko

Souvan dé foi, ni pans bann zanimo lé pli intélizan ké nou. Pou kosa ? Pars, solon nou, bann zanimo i fé sak i ansèrv kékshoz, alé oir nou - lo moun - ni tonm dann l’initilité. Ni pans in zanimo i tyé pa initil : i tyé pou manzé pars li la fain. Mank de po, ni koné dé ka é dé ka, zanimo i fé konm nou ; zot osi zot i fé zafèr initil pou zot. Konbien foi nou la antann lo shien atak in poulayé alé oir poulayé la pa dann son domène épi li tyé poul pou arien. Alor, ni pé dir, zanimo épi d’moun nou lé in pé parèye dann l’initilité, si ni vé dann la manyèr fé d’tor in n’ot alé oir sa i ansèrv pa nou arien. Moin la konète in moun l’avé poin sharète-sa té dann tan !- é li la bar shomin pou anpèsh son voizin sèrv son prop sharète. Ni pé apèl sa la zalouzi d’moun mé zanimo sa la pa zalou sa ! Parl fète mi koné pa, donk mi kite azot rofléshi la dsi é ni artrouv pli d’van. Sipétadyé !