Samdi - apré-midi dann mon vyé kok loto mi ékout in pé san ékouté in-dé z’émisyon la radyo. L’avé poin inn té ki ral amoin. Sof momandoné nana inn la anparl lo shien lo shantèr Dèv -a s’ki paré in shien i sort La Rényon é la ansèrv z’apa pou rokin. In l’asosyasion la port sé plint é lo shantèr Dèv la ramas lo wa-wa ; é zordi, avèk in dalon, li la ékri in liv.

Si mi di azot in bonpé z’oditèr la apèl pou sa, zot i pé kroir amoin é tout té i di sa in fason abès La Rényon. Mèm inn la di z’istoir d’rokin, astèr zistoir z’animo martirizé ala lo mèm politik pou abès a-nou. Tan k’a bann z’oditèr, zot l’avé konm dan l’idé lo méyèr défansèr la Rényon sé zot.

Mé lo shomaj, la povrété, la kantité suisid, la késtyonn la kane, épi d’ot késtyon k’i konsèrn lo réjime ni viv dodan sa la pa in bann késtyon inportan sa ? Poitan si i parl de sa, mi pans sa i dir-ar pa dé z’èr d’tan. Mi pans mèm bann zournalis lé riskab pa trouv sa intérésan. Sirman pa osi inportan ké lo shien lo shantèr Dèv, lo shien k’i fé lo buz dsi l’ internet.