Oté

Lo sistèm proférans, piston, rézo konm in vitrine lo sistèm néokolonyal

Justin / 1 désanm 2017

JPEG - 43.6 ko

Mi sort lir dsi Fasbouk in mésaz bien sinp é pétète in pé inkyétan. La pèrsone la mark sa i di èl i ariv La Rényon la finn l’ané pou travaye dann in krèsh é èl i rode in moun pou donn ali in plas an kolokasyon… Mi koné pa kosa zot i pans de sa, mé, pou moin la pèrsone san vouloir i fé parti d’in sistèm piston, proférans, rézo pou vnir travaye isi shé nou…

Zot la bien antann : èl i vien isi pou travaye dann in krèsh alé oir isi bann pèrsonèl formé pou travaye konmsa, sa sé in n’afèr k’i mank pa. Tout fason, si la krèsh an késtyon l’avé rotourn aèl dsi pol anploi, moin lé sir son post travaye nora pa rèss dégarni bien lontan. Mé i arsanm bien èl la shoizi in n’ot métod.

La suit lo parkour sré intérésan a konète. Kisa i pé dir si madam la i sava rèss dann la plas la. Kisa i pé dir si domin, sansa apré, èl i pé pa gingn travaye é so kou si dann in l’institisyon ? Kisa i pé dir osi, si l’androi èl i sort èl na poin d’moun èl i koné pou vnir isi pou travaye.

Inposib solon zot ?

Na poinn inposib la dan. Pou kosa ? Pars an parmi bann kad, bann résponsab dann lo privé, na dé foi plis d’moun déor ké d’moun isi. Mèm si d’moun isi lé pli nonbré ké demoun laba konm nout tout i koné é sa sé in n’afèr i pé pa kashyété zordi.

Lé vré si travaye l’avé an gaspiy, lo bann késtyon mi poz i tiendré pa d’bout, mé travaye na poin an gaspiy ; ni pé mèm dir sé in n’afèr lé rar konm korn lapin é si li lé rar sak nana i pé arsanm in priviléjyé é sak na poin i pé aparète konm in viktime… Dann in sistèm i apèl lo sistèm néokolonyal. I pé arzout èk sa, si lé shoz i kontinyé konmsa travaye sar plizanpli rar par raport la kantité d’moun i rode travaye.

Dann sé kondisyon lo sistèm proférans, piston, rézo va arsam plizanplis konm in vitrine lo sistèm néo kolonyal k’i fo fini avèk.