Gran zour ! Nouvèl prinsipal ! La pi d’mo pou anparl lo list soisant produi i sava vann pti pri dann gran sirfas. Fini avèk la vi shèr ! La vi shèr, ni bat ali a-tèr ! Bat ali a-tèr ? Kroi touzour, mé pans pa tro, pars dann in zé konmsa, bann konsomatèr lé pèrdan souvan dé foi. Pou komansé dsi lo nonm produi ! Si mi tronp pa, nout dalon Jean-Hugues Ratenon èk lo COSPAR l’avé lité, épi zot l’avé gingn in bès dsi dé-san sinkant produi, kat foi plis ké lo soisant marshandiz zordi i mèt dann réyon. Kat foi plis produi, sé kat foi plis lo shoi... Biensir, la list COSPAR té kritikab, mé sak i sort fé, san manti, lé kat foi plis kritikab.
In n’ot afèr, dan soisant produi, lo konsomatèr va tourn an ron. Li va fini, si li trouv son kontan la-dan, ashté toultan mèm z’afèr. An parmi, z’afèr i plé pa li, i plé pa son bann marmay, i plé pa son bononm, sansa son madam. Si tèlman ké lo moun, san manké, va arkomans ashté lo mèm shoz ou sinonsa va zap la list lo soisant produi. Pars san mantir, demoun nana zot gou, é souvan dé foi, sé lo gran sirfas li-mèm la mèt so gou anplas par la piblisité, par la kalité l’anbalaz. San konté, in pé i mèt dan bann produi do koi atir lo konsomatèr, é mèm rann ali dépandan — i apèl sa in atraktif, si mi tronp pa ! Si tèlman li vé li vé pa, bann produi-la i atir ali.
Armèt la-dsi, sak i fèl amoin plis ankor, sé ké lo l’arzan piblik va sèrv pou anrishi sak i apèl lo grann distribisyon... in bann gran spékilatèr. Konm di lo kont, dann zot salon klimatizé, sa i doi fé ri zot boush.
Alor, parl in gran nouvèl si zot i vé, mé sak moin lé sir, sé ké sak i bat tanbour pou sa, zot i ashté pa sa. Sir é sèrtin ! Sak i done la rou i ral pa sharèt !

 Justin