Sof koué k’i di, mé k’i koz bien... Ala in bann zékspèr, éspésialis dann tout kalité éspésialité, la vni pou oir akoz lo pri la rout tamarin la goumanté konm li la goumanté. Zot la pèz lo pour... zot la pèz lo kont, la diviz lo prozé an morso, lordinatèr la pass lo zafèr dann son moulin.

Aprésa, an gro, la di konmsa : lo pri bann matérièl la goumanté pli vite k’i falé, épi bann voras tout kalité la fons déssi pou kapar lo sharoyaz larzan. Dizon konm rokin kan i santi lodèr lo san. Banna i apèl sa lo syndrome “hollandais” pars la shof bann “Hollandais” an promié.
Bien sir, nana pou diskité, mé moin, moin lé sir bann résponsab la romark in pé tousala : in gro dépans i fé pa in sèl kou kan la fini, i fé firamézir travay i avans.

Mé kan ou lé fine anbéké, kan ou lé fine bien angazé, i arète aou dé solision : Inn, ou i kontinié épi ou pèrd somèy akoz ou i di “kèl pri sa i sar arivé ?”.
L’ot, ou i arète tout.
Alor in n’ot kalité Syndrome i aspèr aou : komans in n’afèr san anshévé, lèss in n’afèr an ruine, épi atann rézin maron èk sapan i mont déssi. Issi, sa na in nom, i apèl sa “syndrome katédral kassé”. Pèrsone la pa vouli pran lo résponsabilité fé in n’afèr konmsa. Na artrouvé !

Justin