Oté ! zafèr la gaté marmay ! Bann l’adroit-droit la fash avèk le parti l’UMP, akoz zot i prétan la pass azot in zanbèk pou zéléksion prézidan konsèy zénéral. Konm noré di méssié Kornèy, zot la parti vinn-sinq, é “par un prompt renfort”, zot lariv diz-nèf lo zour lo vote. Kissa l’otèr ?

Sirtou la pa la fote lo mèr Sinte-Marie : non va ! Dizon li la fé konm kolin-mayar : la anmar ali in foular si lo zié, la roul ali an ron, épi kan la tir lo bout la toil, li té i koné pi son dovan èk son déyèr. Li la vni pou in nafèr, épi li la sanz toute. A par sa, la pa li l’otèr si li la rèst a tèr !

Alor, la “désire la kart l’UMP”, la fé gro-boush kan lo minist la vni, éstèr zot i vé fé z’ot parti.... Sa sé z’ot afèr. Mé par l’fète : shak foi bann la droit lavé, konm dann zot idé, la Frans lavé in bon prozé, zot té kont, zot la ménas divorsé. Zot té kont la loi départman fransé, zot té kont labolision lésklavaz. Oté ! Sré t’i pa k’lo tan Baco avèk Burnel i arvien... Baya ! Zot i oi in pé té i trap minist-la i bate sa dann lo ?

* Dëmoun gouvèrnman la Frans lavé anvoy pou aboli lésklavaz dann Maskarègn.

Justin