Pou komansé mi sava romète azot an mémoir in zistoir lontan : lavé inn foi in gro madam friké. Anplis ké sa èl téi rèss dann in shato bien shofé dann tan la fré. Pars listoir i éspass dann in péi d’fré. Donk lo madam i sava la mèss minui é fransh vérité la fré téi tate pou vréman. Alors, dann la fèrvèr son mèss minui, èl i di avèk son koshé-sak i amenn son kaross-kan nou v’arivé talèr ou v’alé fé in distribisyon do boi avèk manjé pou bann pov. Koshé i di : « Dakor Madam ! ».

La mèss i dir in pé é aprésa lo madam avèk son koshé i rotourn dann shato. Zot i rant anndan é zot i romark i fé pli méyèr ké déor : l’èr lé bien tyède, si tèman lo madam i tir son linj sho dsi èl é èl i san aèl bien. L’èrla èl i kalkil in kou épi èl i di avèk son koshé : « Final de kont, i diré l’èr la résof in pé. Donk la pa bézoin fé sak moin la di aou talèr-la, nou va oir d’isi domin lo tan konm li sra. Alon romète a domin nout distribisyon ! »

Kèl sé la moral zistoir-la ? Sinploman ké lo madam i pran son ka pou in zénéralité. Konm èl i viv, èl i pans lé zot i viv parèye é si pou èl i fé sho, si pou èl manzé lé bon, èl i pans pou tout lé zot i fé sho galman, é lo manzé lé bon osi. Astèr kèl loson ni pé tir ladan dann nout tan anou ?

Mi pans zot i ansouvien kozman prézidan La frans kan li téi di konmsa, lo tan d’apré sar pa ditou konm lo tan d’avan pars li oi tré bien l’imanité épi La frans épi l’érop i pé pa kontinyé konmsa. Malorozman moin na konm linprésyon bann bone zintansyon i komans éfas in pé avèk lo tan. Dann son dèrnyé kozman li téi di pa : « Alon sorti, alon kiltiv anou, alon rotrouv la vi nou la konéte avan lo kovid 19 ». Avan li téi di pa : Alon téat, alon sorti, alon amizé, alon voté, alon viv san trakass anou pou sak lé riskab arivé é k’i ariv ar pa ditou.

Mi vé pa mal parlé, pars mi dout pa ké la vi domin sar pa parèye la vi konm èl lété avan lo pandémi, mé mon traka sré ké la vi domin sré pli pir ankor ké la vi d’avan pou tout bann bordé d’ la sosyété. La vi va amontr anou sa sirman. An atandan ni pé roviz listoir moin la rakont in pti bout an-o la.