Dann promié tan la départmantalizasion, in nouvo préfé l’arivé. Si mi tronp pa, li té i apèl lo préfé Philippe. Kan li la débarké, li la di : « Je suis venu ici pour vous gouverner ! ». Mon papa lété in rouz de fon dovan létèrnèl. Mi koné pa kosa li la di la-ba, kosa li la kriyé ! Stan-la, moin té mète ankor kilot-gronouy i tak par ann sou. Mi pé dir azot, kan li lariv la kaz, in moush téi poz pad si li, tèlman li té bandé an ké d’bèf.

Li lé pi la, domaz, mé la vi lé konm sa : si li lavé été la, épi si li lavé antann lo préfé di va fé kan mèm lizine éléktrik Le Port, sak i sava polié tank-sé-t’assé, anplis li lé klassé Sévézo, mi kroi li noré pik ankor in kolèr é pa pou zoué siouplé !

Koman, ala in lizine, la pa vréman bézoin ali, épi tout kréol l’apré donn la min pou dévlop lénèrzi dirab, épi in moun i sort déor i ariv pou di anou : vé ou vé pa, va fé kan mèm. Rokoné, in n’afèr konmsa, i pé fé ankolèr aou ! Akoz ? Lo tan gouvèrnèr la artourné ? Mi éspèr i finira pa konm zistoir Vauboulon. Touléka, mi souèt pa li sa.

* Selon l’expression du porte-parole des Verts sur RFO-Radio

Justin