Médam zé mésyé, la sosyété, koz èk moin sé koz èk in kouyon, mé sé o pyé d’lo mir k’i oi lo bon mason. Mézami, kozman moin la mark an-o la, sa in kozman in péi i apèl Sénégal. Kosa li vé dir par l’fète ? Lir ali lé pa difisil é la pa bézoin ou néna in gran linstriksyon pou sa. Mé solman si sé in provèrb i fo trouv dan li in sans par raport la sosyété, sansa par raport la vi-in sans pli zénéral dizon in sans figiré. Lé vré néna in konparézon rant lo tan-laz - épi savon, pou di zistoman inn sé pa l’ot : lé vré savon i blanshi linz, mé lo tan i blanshi lo moun. Dann la lang fransé i di « blanshi sou lo arné » konm in zanimo la tro travaye. Mé akoz so konparézon ? Pou donn in léfé plézab, é pou ède anou bien mète sa an mémoir mémoir. Inn foi nou la di sa, mi kite azot bien rofléshi lo kozman. La dsi, ni artrouv pli d’van. Sipétadyé.