Oté

Lo tan lé konm in lime, li travaye san fé dézord

In kozman pou la rout

Justin / 24 févrié 2021

JPEG - 43.6 ko

Mézami proverb mi sorte mark anlèr-la, sa in kozman l’Alzéri, in gran péi konm zot i koné lé rant Lo Marok épi la Tunisi é dann son milyé i dsand par lo Sahara ziska bann péi l’afrik de l’ouèst… Kozman-la lé vré dann péi-la é pa solman pou d’moun, lé vré pou nou issi dann loséan indien é final de konte lé vré partou pou toute sak lé vivan… L’om I panss li lé la pou toultan bien instalé dan la vi é poitan nou lé mortèl é kan ni kalkil in kou ni koné sa. Lo tan sé noute zami épi sé noute zènmi. Noute zami é nout zènmi, pars nou lé inskri dann dimansyon-la : sé dann tan ké nou la éné, nou la grandi, nou la vni adilt, nou la pass bontan. Mé sé dann tan-la ké nou la soufèr, ké shagrin la travaye anou, ké doulèr la fatig anou. Sé a partir d’la k’nou va pass l’ote koté la vi pou alé konm mi pans souvan dann péi inkoni… Shak zour, shak èr, shak minite, shak sogond, bien passé sansa mal passé i raprosh anou lo tan pou pass dann gran baro. Alé ! Mi kite azot rofléshi la dsi é ni artrouv pli d’van-sipétadyé assiréman.