Médame, zé Méssyé, la sossyété, koze èk mwin sé koze èk in kouyon, mé sé o pyé d’lo mir k’i oi lo masson.

Mézami, mi panss kozman mwin la mète anlèr-la i sorte dann in péi i apèl l’Iran, mé sak mwin lé sir sé ké néna kozman-la dann in pé toute péi. Kan mi lire kozman-la, sa i fé panss amwin demoune la viv lontan é apréssa zot téi koné myé la vi ké mwin é ké bonpé d’moune. Lé vré avèk in bon l’amontrèr épi in bon l’aplikassion wi pé konprann kossa i lé la vi, mé si ou mèm wi vé konprande la vi, i fo ou néna lo tan pou fèr, é lo tan i sava avèk laz ou néna.

Zordi, in pé dann toute péi, demoune i panss avèk toute bande moiyin téknik néna lé fassil konète la vi… Mwin pèrsonèlman pou konprande la vi, sanm pou mwin, i fo wi done aou pou rofléshi, pou kalkilé, pou konparé, pou rolativiz déssèrtènn shoz, pou done d’ote in linportanss ou té i done pa momandoné.

Sé pou sa kozman mwin la mète an-o la, i bote amwin bien é mi invite azot a rofléshi la dssi é ni rotrouv pli d’van. Sipétadyé.