Zéléksion lontan, zéléksion folklor ? La rak, larzan, la frode, la violans. Nana arienk sak la pa koni sa an vré i pé di sa lé folklorik. Akoz, bonpé militan la soufèr dann zéléksion lontan. Kan i fé bouraz lirn, ou lé la ou i gingn pa kalé. Kan i tir in biltin, i lir in nom la pa marké déssi, ou i gingn pa kalé. Si ou la pa disparète an vitès, i obliz aou signé in nafèr la pa zist. Konbien bann vié militan la gingn gran traka pou sa.

Mé tan-la lé déyèr nou ! Déyèr nou ? Pa vréman : agard soman sak la fé Sin-Pièr lané 2001, épi lané 2008. Agard mouvman larzan, mouvman travay, la violans. Na in vié militan la konète so tan an bob-la, épi li téi di : la droite i fé sak i fo pou gingn son zéléksion.

A, bon, akoz in pé la gingn z’ot rèss trankil, ou va di amoin so tan-la la fini. Tienbo pa biro va voir si zèf poul i donn pa ti-kanar ! Ou va oir si i konfonn pa po d’shanm avèk pla kouvèr. Kissa i pé mète son min dann fé pou dir zéléksion so foi-issi lété prop vèye pa koman. Kissa i pé dir lidé la frode la fine sort dan la tète bann frodèr... Tansion lé ga ! Tansion lo tan lontan i arvien...

Justin