Dalon, dalone, moin lé déja asé ajé pou dir azot moin la pa viv toultan dan la modèrnité. Moin la konète la vi lontan èk son z’avantaj épi son l’inkonvényan. Pars l’avé z’avantaj, mé l’avé osi z’inkonvényan ! In l’avantaj ? La vi té pli trankil é té pa bézoin kas la tèt pou fé in n’afèr, té i sifi kopyé dsi sak lé z’ot téi fé. In l’inkonvényan ? la rarté, pars nou té pa dann in sosyété l’abondans. In n’ot l’inkonvényan ? Kan ou té dan l’érèr, é bin ou téi rès dan l’érèr. Kan ou té dan la pèr, ou téi rès dan la pèr. Donk la pa moin va di, avèk trémolo dann gozyé : « A ! lo tann lontan ! Sa lété vanté sa mounoir ! » Parèy pou la modèrnité:sar pa moin pou vant ali toultan é pou tout z’afèr.

La pa tousala. Mon kozman i ral amoin in koté mi vé pa alé. Ousa mi vé alé ? Mi vé zis dir azot, koméla, si ou i vé in n’afèr ou i pé komandé, sansa ou i pé alé rodé sir plas ziska dan lé kartyé, é ou la pi bozoin alé an vil. Mé soman, na dé foi, ou i pans ou pé gingn lé shoz fasilman. Kisoi in partikilyé ! Kisoi in l’asosyasion ! Kisoi in parti konm la n’ot. Poitan nout tout i koné nout parti l’apré siport son tan vash mèg. Mi sava pa dir azot tout nout malizé, mé zot i koné sirman in pé. Koman nou va fé pou ansort la-dan ? Méyèr fason, mi pans sé ropran nout baton militan.

Ropran nout baton militan, kosa i vé dir sa ? Dann tan, mi souvien nou téi vann vignète, nou téi vann Témoignages, nou té i vann foto Paul Vergès é kan in moun nout parti la fé in liv, té nou téi sava plas sa èk demoun, kisoi nout z’adéran, kisoi demoun té i marsh pa forsféman pou nou, mé l’avé réspé pou nou.
Biensir sa té i marsh pa vit konm internet. Biensir té i falé marshé, té i falé kozé, té i falé aport la prèv nout fidélité pou nout bann z’idé… Moin lé sir désèrtin lé riskab di mi vé artourn dann tan sharète bèf, dann tan la marine a voil, moin lé mèm sir in pé lé riskab dir moin lé kont la modèrnité. In pé lé riskab dir, koméla, i fé pi z’afèr konmsa. Mé kan bann téknik modèrn i marsh pi asé bien konm k’i fo pou nou, kosa i fo fèr ? D’apré zot, i fo pa tiliz bann métod la fine fé zot prèv ? Moin mi pans ké oui. Sé pou sa, sanm pou moin, lo tan militan i arvien !

 Justin