Lo tram-trin, sa in promès éléktoral i di, mwin mi antyin pa. Mèm si pou in pé, in promès éléktoral i angaj ryink sak i krwa, sak l’espri lé kourt konm zot shové, mi andiskonvyin pa non pli. Mé sa la pa la promès in boug sou samdi swar, sinonsa sak in léstrévagé, ou inn ti san-binyé, ni in kakasé si bor shomin. Sa la promès in prézidan la répiblik foutor. Dann kèl fo trin li ral a nou ? Zistoman, si l’été inn ti ryin ditou, inn ti promès la kouyonad, nou noré di, fé pa in ka, anshèv lès tonbé, ni pé pa. Ni pé pa éfasé, lé tro inportan po nou. Pa bozwin di nout gro kèr la lévé ou nou rod larlik. Nou la désid ansanm tousala, la di vot pou ou, va fé, la rényon la vot an touk pou ou. Ou la promèt yèr, ansort a ou zordi. Touléka, bann jénn i an pé pi atann, alorss, aforss alé a lo kalbass va pété.pou kosa zot la kass tout nout prozé dévlopman ?

Nou lavé bonpé prozé pou démay nout péi, pou donn travay marmay, nout mézon civilisasyon, sa osi té bwyn asiz, té byin okipé, pou réini a nou ansanm(ni roparl plitar dé sa), é ankor d’ot, mé lo bann sosialis la may a nou in kal an 2010 la kass nout trin é la mèt lo bann san konprénir an plass, la dégrinn tout. Mé lo tram-trin sé la promès lo prézidan.kont si nou pou soukouy a li, pou sonn la klosh é pou bat tanbour. Mwin mi krwa, sé lo prozé kapital pou la rényon, in prozé daplon, sé lo prozé larpon konm i di. Li dovré èt la lokomotiv pou anbèk tout konpartiman nout dévlopman ansanm. Sanm po mwin si i fé, li va mèt nout péi si lo ray lavnir, li va ral tout dovan. Pou galiz in pé shomin nout tout. Mé pou sa i fo li ariv a l’èr. Ankor zordi mi di, ni domann pa souplé, ni domann pa mèrl blan, na pwin, nou réklam sak i dwa a nou.ryink sa. Tansyon tronpé ni koné konbyin i dwa a nou dopi préd swasant diz’an. Ni koné konbyin i mank, kamarad la marké tousa i mank si karné.

Konm di mon dalon, nou lé dann la kroisé shomin, swa ni anbrèy é ni gingn braké pou trouv lo shomin galizé é ni avans, swa nou lé pa kab, motèr i tinn, ni déray. Konm ni sava, mwin nana in pé doutans, lo tan i pass baya, mèm si gramoun i di, lé tar, lé tré tar mé lé zamé tro tar. Nana i di osi lo tan pèrdi, sé lo tan fouti.