In kamarad la rakont amoin in zistoir.
Sa té éspas dann tan li lété in marmay. Donk dann tan-la, li la gingn in kou d’mal-o-vant, avèk l’éshofman, lo san dan la sèl étsétéri-étsétéra-la ké lo ra.
Dann tan-la, de moun té i soign in pé avèk zèrbaz : té pa toultan k’sa té i fé d’byin, mé pa toultan non pli k’ sa té i fé d’tor.

Donk, mon kamarad, son famiy té i done ali tizane fèy-kola, vik k’son gromèr lavé di sa in bon romèd pou marmay nana malo-vant. Mé olèrk passé, son maladi té agrav.
L’èr-la, in soir, li gngn pa somèy é ala k’li antann son papa i di konmsa èk son momon : « Moin lé sir zanfan-la i boir pa byin son fèy kola ! ».
Landomin, li la parti médsin épi la done ali in bon romède la guéri a li !

Akoz mi rakont sa ? Pars mi èm rakont zistoir, mé pa solman. Pars mi antrovoi, dann zétazénéro, inn-dé komik, kaziman inn-dé zéro la gosh in shif, l’apré di, sak d’apré zot, lé bon pou La Rényon...
Moin, mi profèr fé konfyans mon parti, épi sak lé alyansé avèk li, pars i suiv la sityasyon nout péi épi i propoz bon solisyon. Mi fé pa konfyans bann z’ouvriyé la vinn-sinkyèm èr, konm bann tizanèr la makoteri...
Mi pans lo tan fèy kola, konmsi-konmsa, pou ninport de koi, tan-la lé fini !

Justin