Donk, la ministrèz z’Afèr zétranj la fini par alé. Mi sipoz, pou sa, èl la gingn inn-dé présyon amikal. Konm di lo shanté : « Boukané-shominé, avèk lo présyon v’alé ». Poitan, èl la di èl la pa fé arien. Poitan, promyé minis la di li na touzour bien konfyans dan èl. Poitan, lo pti prézidan la di la mèm shoz galman. In zour moin la lir dann in zournal in kozman a popré-konmsa. Kozman-la té i di, si out shèf i di an piblik li na konfyans dan ou, méfyé aou. Sa lé konm l’antrénèr in lékip fotbal i pèrde in bon pé. Sa lé konm in gouvèrnman, pars i diré ninport-ékèl landroi ou i lé, ou lé fizib avan toute, vinn-katrèr déssi vinn-kat, zour pou zour, moi pou moi, l’ané pou l’ané, ou lé fizib !
Mé MAM la parti. Mi sipoz, èl la pa tousèl pou alé pran vakans dann péi bann diktatèr. Mi mazine la pa èl tousèl la pran l’aviyon in diktatèr. Mi pans èl lé pa tousèl pou an avoir profite lo pti sèrvis in diktatèr, sansa son kolonm. Moin la mèm antann dir, lo promyé minis la parti pass vakans dann l’Egipt, é méssyé Moubarak la done ali in séryé kou d’min, késtyonn l’aviyon, késtyonn bato, é lo rèstan. Sa la pa in sogré, vi k’li mèm la fé sort in kominiké, konmsa bann dépité, bann sénatèr é bann zournal i konpran bien son sitiasyon. Lo pti prézidan la fine dir li konpran lé shoz, donk li risk pa arien. Sof si mon prinsip an-o-la lé in pé valab. Ziska zordi, moin la poin la prèv ké li lé pa.
In n’ot afèr moin la lir dann fime la guèr. Si lo bann z’ènmi i karsèr aou, i fo bien majiné kossa banna i koné déssi ou, konm sa ou i pé di in boute la vérité… zis in boute é pa plisk-i-an fo. Méssyé Fillon, sa in boug instruiyé. Sa in boug pli kalifyé ké moin, é in n’afèr mi koné, forsé li ossi li koné, piské mi di azot li lé kalifyé, é pa solman in pti pé. Donk, kèl boute vré li la fine déklaré, é kèl boute vré li la pankor déklaré.
Moin lé pa dann sogré bann bondyé, ni dann sète gran dyab. L’èr-la, dann mon kèr, kan mi kalkil inn la fine soté, mi di lé possib in n’ote i vien déyèr, mé kisa ? Fransh vérité, mi koné pa ; Mé konm mon tète i èm travay tor-an-travèr, mi arète pa poz amoin in késtyon, é so késtyon-la sé : "kisa lo tour éstèr ?".

Justin