Zistoir moin l’apré rakont azot, sa in zistoir Madégaskar, Honoré Rabeshala, in vré dalon, la donn amoin in kopi é moin la mète ali dann la lang kréol La Rényon pou bann moun i lir zoinal témoignages é pou tout sak va lir sa dann nout domin anou. Astèr sak néna galé dann zot kour, mi invite azot asir épi rakont lo zistoir pou tout demoun va pass koté zot épi va ékout listoir-la.

L’avé inn foi pou inn bone foi mésyé lo foi la manz son foi avèk in grinnsèl.
Dèrnyé foi nou la aprann Ifara, in zoli fiy, inn an parmi lo troi sèr, lété sové par in pti souri mé lo monstré Itrimoubé la rotrouv son trass é lo konba rante li épi la jenn fiy i tard pa pou komansé. Lo monstré néna in fors sirimène é son kor lé tayé pou lo konba. Ifara sé in pti jenn fiy lé pa tayé ditou pou la lite kont in monstr kaziman invinsib. Solman la souri, mi rapèl azot, la di avèk ifara, amenn avèk èl in balyé, in baton, in zèf épi in galé bien ron é nou va oir kosa èl i sava fé avèk sa.
Itrimoubé la kriyé : « Astèr Ifara, ou i gingn ar pi shapé, sé moin lo mètr ! »
Ifara la zète son balyé atèr épi èl la kriye in kou :
« Par mon papa é par mon momon, mi souète balyé-la i transform an foré brousaye épi zépine Itrimoubé i gingn pa travèrsé. ».
Mé lo monstré avèk son gran ké, la fé in shomin an travèr lo brousaye é li la travèrsé.

Kriké ! Kraké ! Kriké Mésyé ! Kraké Madam !
Itrimoubé la kriyé : « Astèr Ifara, ou i gingn ar pi shapé, sé moin lo mètr. »
Ifara la zète lo zèf an diréksyon itrimoubé é astèr-la èl la kriyé : « Par mon papa, é par ma momon, Mi souète zèf-la i transform an gran bassinn lo é Lo monstr i gingn pa travèrsé ! »
In létan la formé pou sépar la jenn fiy avèk lo monstré, mé solman Itrimoubé la boir tout dolo épi li la kriyé :
« Astèr Ifara, ou i gingn ar pi shapé, sé moin lo mètr ! »
Ifara la zète son baton atèr épi èl la di : « Par mon papa é par ma momon, mi souète baton-la i vien in foré pou anpèsh lo monstré travèrsé ! »
Avèk son gran ké, Itrimoubé la rash lo bann pyé d’boi dopi lo priomyé ziska lo dèrnyé. L’avé pi d’baraz rant la jenn fiy épi lo monstré.
Katriyèm morso lé fini-la proshène foi nou va oir lo sinkyèm bout.