Zot i koné, l’Erop la done la Frans dé zané an plis pou diminyé lo défisit son bidzé. Olèrk gingn fé sa finn l’ané 2013, èl nora ziska 2015. In rékonpans pou lo zéfor bann Fransé la fine fé ziska zordi ? Kroi pa sa, sé pa in rékonpans, mé in kado anpoizoné. Pou kosa mi di sa ? Pars, boudikont, l’Erop i vé obliz la Frans amèn in politik Briksèl la désidé.

Pou komansé, la di konm sa, i fo fé in réform rotrèt sèt ané, san pèrd lo tan. Aprésa, la di konm sa, i fo arshèv la privatizasyon bann lantropriz piblik konm l’EDF, konm la SNCF, konm d’ot ankor. Lé vré, dopi lo tan la droite té fine fatig in pé so bann zantropriz piblik té i rès pi granshoz konm zéstyon piblik, mé l’avé konm in réstan, é sé so réstan-la ké l’Erop i vé pi. I paré mèm, si i kontinyé, bann salèr lé riskab bésé. I paré mèm l’Erop i vé kas lo SMIC. Nana ankor d’ot kalité mézir, a popré dis, mé mi sava pa anparl sa toutsuit. Nou va oir pli loin.

Alor, gouvèrnman fransé la bandé. Lo prézidan konm lo Promyé minis la di, la Frans va réform aèl par èl mèm san alé rod lèr avèk Briksèl. Mé, konm di lo kont, zot la bo rédi zot nèr d’kou tèlman zot lé an kolèr, mé alé pa kroir zot va gingn rézisté... Désèrtin i di, gouvèrnman fransé lé sirtou okipé pou trouv la manyèr pou fé aval bann Fransé la pilil amèr. Dopi in pé d’tan, nou lé fine abityé so métod-la, é moin lé pré a paryé k’la pa koméla li va shanj manyèr. Dabor i di, va tyé sèt blès katorz, aprésa li kriy tir.

Nou mèm ni doi fé konm si sa i rogard pa nou ? Ni doi konsidèr sa sé konm lo dsi fèy sonz ? Mi kroi pa, pars si l’Erop i ézit pa domann la Frans bann réform danzéré konm sa, mi pans pa bann péi l’Outre-mèr i doi éspèr gouvèrnman va fé azot bèl-bèl kado. Tansyon, pangar, léspès tsounami i sava boulvèrs la Frans, lé riskab bat anou ankor plis atèr !

NB : Par l’fèt, zot i koné, zordi i tonm lo soisant diz-an lo Konsèy nasyonal la rézistans. Zot i koné, sé son program la modèrniz la Frans é la fé avans nout droi ? Zot i koné, biensir ! In dat osi inportan dann listoir la Frans.

Justin