Mézami, manyèr lé shoz I roul, mi wa déza-konm dopi in koupe de tan – toute bande moune I pans zot lé an droi d’parl pou toulmoune apré di dsi tou lé ton : sak la gingne lo zéléksyon sé labstanssyon. Ala in dékouvèrte zot I fé la, mèm avan lo zéléksyon nora pi di in n’afèr konmsa.

Néna demoun i di kèl zour lo zéléktèr i sava voté. Mi panss bande moun-la ui koné bien mantalité demoun vik zot i koze an n oute nom, vi k’sé zot i diriz lé z’afèr pou nou. Bon, dakor ! alor pou kossa zot la mète promyé tour zéléksyon lo zour la fète dé père ? La pa promyé foi i fé sa : zéléksyon éroopéène ossi la tonb in zour d’fète, mé lésplikassyon lété ké toute l’érpope i vote an mèm tan.

So kou issi, kèl sé lésplikassion ? Pou kossa apré avoir roporte lo zéléksyon d’in an, pou kossa la tonm dsi in zour d’fète familial ? Na poin lé splikassyon. Bin alor akoz la rofiz lo vote par korèspondanss ? Noré gingn pliss votan, sa lé sir.

Astèr néna sirman in takon d’ote zésplikassion Konm par ébzanpe si noute zinstitisyon lé bien adapté par raporte nout péi, épi son bande problème. konm si nou téi pé alé vote kèr klère kan la di anou : kovid=danzé d’mor ! Zot i panss lo moun lé fou ziska kèl poin ? Néna galman in bande demoun-plizyèr antouléka-néna problème avèk la zistiss. D’ote rézon ankor pétète bien rofoulé dann noute lintèryèr.

Anfin, i di somenn proshène i sava rovote ankor in kou é nora pliss demoun. Alon atande pou oir !