Oté

Lo viv ansanm rényoné ? Sak i avans pa i rokil

Justin / 22 févrié 2018

JPEG - 43.6 ko

Mé zami, ala in n’afèr moin la trouv dsi in blog rényoné avèk konm tit : « La shapèl ardant Sin-Bénoi intèrdi pou in dépouye malbar ». Lo listoir banna i rakony dsi l’internet i rakont in madam la désédé. In madam azé vi k’èl l’avé 81 z’ané. El té i pratik la rolijyon tamoul – sansa hindoue si zot i profèr - dopi lontan é sa famiy té i vé roganiz son l’antèrman konm bann tamoul i fé, koméla, in pépartou dann La Rényon.

La Rényon, péi la tolérans, La Rényon lo péi lo « viv ansanm » konm i di souvan dé foi ; la famiy la domann la shapèl ardant sin-Bénoi pou roganiz la véyé épi lo bann priyèr épi galman lo bann rite i akonpagn lo finéraye. Toulmoun i domann plizanplis shapèl ardant-la pars zot i koné koméla bonpé d’moun lé séré dann z’ot kaz, kan lo kaz lé pa an otèr é sé pou sa in bonpé komine la fé bann shapèl ardant, mèm bann sant finérèr. Inn-dé z’androi ou i pé mèm bril out mor si ou lé dakor avèk sa épi défoi i dévèrs la sann dann bann zardin finérèr, sansa i mète dann in l’irn é lo l’irn dann in bann l’androi prévi pou sa éksepré.

Donk lo kor, d’apré sak i di l’ariv dovan lo shapèl, mél o shapèl té fèrmé é sé l’èrla la famiy la antann de dir la pa in l’androi pou malbar sa in l’androi pou katolik. La famiy la parti o nouvèl la méri é afors afors néna in l’adzoin la fé rouv lo shapèl ardant pou roganiz lo véyé… Lo blog i rakont la famiy épi lo bann z’ami lété plisk’an kolèr. Noré pa été étonan k’in n’afèr konmsa i dézénèr.

La dépouye l’atann plis ine èr ép la trouv in solisyon zis mé sa i fé majine amoin lo viv ansanm rényoné sa sé in n’afèr bien frazil. Moin la koni lo tan désèrtin prète katolik lété k’i fé présyon dsi bann pratikan lé z’ot rolijyon mé mi pansé lo tan-la té fine pasé. Konm koi i pé dir ou lé pa toultan vizilan konm i fodré. La brèz konm i di, i kouv dsou la sann é i fo touzour pran prékosyon.

Lo viv ansanm rényoné, Antansyon, kan i avans pa i rokil.