I prétan dir, nout mémoir sé nout l’idantité. Konbien foi ni ropass, dann nout tèt, lo fime kan nou lété marmay, kan nou lété in for marmay pou bien réfléshi dsi kosa nou la viv, koman in n’afèr la mark anou, kèl souvnir nou nana par raport nout pasé. Désèrtènn foi sé nou mèm ki an souvien, désèrtènn foi sé dmoun la rakonté é nou la ramasé. Touléka, nout mémoir lé inportan pou pèrmète anou romont dann nout vi, ar-oir tout demoun nou la viv an parmi, épi tout sak l’ariv anou ,bonn shoz, konm movèz shoz. Arzout èk sa, ou i rakont sa out zanfan, out kamarad,in moun ou i fé la konésan. Ou i rabash ? Oui, mé sa sé in rabashj bien nésésèr, pou moin pou mon bann zami,pou mon bonn konésans.

An o la, moin la koz pou d’moun la amène inn vi normal, pars i ariv kék foi lo fil out vi i kass é i gingn pi arkonékté. Kansa ? Kan par égzanp ou i pèrd la mémoir, konm i di ou i dovien amnézik... Moin na in vag souvnir in pyès téat moin la vi dann télé. Lo moun la fé sa té i apèl Jean Anouilh, é son pyès, li la apèl sa, « lo voiyajèr san bagaj ». Koman lo boug la pèrd la mémoir ? Lé sinp, li la gingn in gran shok é tout sak lété avan lo shok, li rapèl pi, li an souvien solman sak la éspasé apré. sé dir azot, si sa sé in n’afèr dir pou li, pars li koné pi kisa li lé, kèl vi li la améné, sé konm di lo kont in vivan an plin dann in dézékilib rant in pasé la fine éfasé, in prézan li konpran pa pars li la pèrd bann poinn ropèr, é pou lo fitir lé parèy galman..

Poitan, normalman, si ou la pa malad, ou na i lo droi an avoir out pasé. Né sou X ? Oui mé, kisa sé mon momon, mon papa, mon gran-mèr ? Moin na poin lo droi konète, in n’afèr demoun i di lé sinp, mé si tèlman konpliké pou moin...Bin nout bann rényoné la pran shomin légzil pou alé dan La frans, épi la pèrd kontak èk zot famiy, zot i pé poz azot in kantité késtyon : pou kosa la trap amoin dann in péi mi koné pi, pou transport amoin dann in péi mi koné pa ? koman mi anmar la kord kasé ? kisa i pé ède amoin anmar ali ?Si la loi èl mèm la pa gingn prévoir in sityasion konmsa...Moin la poin in sèl bagaj avèk mon nésésèr dodan pou amontr amoin kisa moin lété,kisa moin lé,kisa moin sra in zour. Moin lé konm in voiyajèr san bagaj.

Justin

NB- Bann dépité la vot in loi pou di shak moun na droi son pasé. Lé bien, méastèr i fo aplik sa., é i fo pa lès sa konm in kokiy vid.