Oté

Lo vote pou lo FN : in mové l’idé, i fé pa in bon politik

Justin / 12 zanvié 2018

JPEG - 43.6 ko

Beaucaire ? Sa i di azot kékshoz konm vil ? Moin pèrsonèl sa i di pa moin granshoz. Sof in n’afèr kant mèm : sa i rapèl amoin, bann léktir nout mète lékol téi done anou pou lir. Sa i rapèl amoin bann lète mon moulin in sèrtin Alphonse Daudet ; in l’ékrivin désédé zordi é dopi lontan, mé téi koné bien tourn son bann lète tèl fason ou téi lira li dopi lo komansman ziska la finisyon san zamé pèrd lo fil sak li té apré rakonté.

Mé Beaucaire zordi, d’apré sak i paré, la pi bann zoli shoz la. Beaucaire zordi sé lo FN la pran la méri é konm li fé partou, son bann mové l’idé li pans sa sé in bone politik. Si ou i fé sa dann Beaucaire lé konmsi ou téi rann bèf, sansa koshon obligatoir dann bann kantine La Rényon ; dizon lé konmsi ou téi vé mète bann mizilman sansa bann zanfan tamoul an déor d’la kantine.

Lo mèr la réponn sak lété kont son désizyon : la kantine la pa in lotèl kat zétoil. Sa lé sir si i rogard lo pri mé pou la kuizine bann kat zétoil zot va éskiz amoin mé mi profèr manzé mon kaz si moin lé pa tro loin. Si moin lé loin in barkète la boutik i pé fé l’afèr… In romark solman : l’opital osi la pa in réstoran kat zétoil mé i domann aou kant mèm kosa ou i manz, kosa ou i manz pa, kèl manzé ou lé alèrzik, kèl manzé i pass bien dann out léstoma.

Pou arvnir dsi la késtyonn kantine moin la pa pou bann ménu obligatoir, inik, konm in n’ot komine la désidé. Pars si l’ékol lé layik, la kantine galman i doizète layik é sirtou i doi pa alé kont sak lé défandi par in gran rolizyon pars i fo pa obliy l’Islam sé lo dézyèm rolizyon néna dan La frans zordi. Tout fason demoun rasis sé demou rasis é la poin arienn bo pou tiré.

Alor siouplé, bann rényoné i domann vote FN, zot i dovré fé i pé atansyon sak zot i fé. Pars konm mon défiin papa téi di : lé tro tar pou tyinbo out komisyon kan ou la fine fé dann dra.