Dann tan avan, navé touzour inndé marmay lékol té ariv lo matin, té koné pa loson ou navé pa fé dovoir, akoz in takon korvé falé fé zot kaz : manzé coson, manzé lapin, saroyaz do lo, rod do boi, èk in ta zafèr ankor.

Alor lo mèt, san réflési, té ki donn koud règ an fér ou koud poin dann koko, défoi larm lo zié té i koul. Anplis, té ki trèt lo marmay tout’ kalité l’non, kom : zidio, bourik, zabriti…, etc. Mé dann tan-là, té konsidèr sa kom normal. Zordi, si par malèr, in zansénian i fé in zafèr komsa, non sélman sétin mank réspé, mé sirtou tangaz i pét, épi li lé mor. Lo tan zordi lé pi lo tan avan. Nout sosiété la bon pé évolié. Rèzman.

Pourtan mi lir lot zour, dann zournal, lo Mèr Sintandré, Jean-Paul Virapoullé, i éstim ké tout’ bann zéli lé pa dakor èk son lidé, sétin bann d’zabriti ! Sa i vé dir ryink li, néna lo sians infiz. Lé zot sé dé bourik. Kit-tamèr va ! Sa i mérit tribinal koréksionél.

Tousa, akoz son lamandman, alinéa 5, lartik 73 , gravé dan lo marb, kom li di. Pourtan, tout’ politik la Rénion i di zordi, lo modèl la pi bon, i fo sanzé, i fodré ot soz. Tout’ i di, lo promié zafèr par komansé, sé siprim lo lamandman Virapoullé. Mim Macron lé dakor. Virapoullé i artrouv a li tousèl, lo ki à tèr. Magré sa, li vé ryin antann, li vé ryin konprann, ziska rod rabèss sak i rofiz manz son pin rasi.

Finalman, byin réflési, lo vré zabriti, sé Virapoullé li mimm. Mé lé pa sir, si li lé konsian son ridikil.