Na poin lontan, moin la antann dési in radio in moun bien instruiyé apré di, i fo pa pans dévlopman pou La Rényon. I fo mèm pa révé ! Mi koné pa kisa li lé, mé d’apré sak li di, li sé in boug konpétan. L’èr-la, li di konmsa, i pé pa dévir lo do avèk la vérité. La vérité, pou li, sé ké La Rényon lé loin, lé izolé, na poin matyèr promyèr, lé sirpéplé... étsétéra-étsétéra, la ké lo ra. Moin lé sir lo boug i doi zète inn an parmi bann éspésyalis dann tout éspésyalité i mank pa, kaziman in dizèr mové z’avantir.

Donk, si mi konpran bien, bann moun i kroi dan nout dévlopman, sé in bann révèr évéyé. Bon pou sa mèm !

Konm par azar, moin la gingn lokazyon, inn-dé zour apré, antann in kouzin i sort l’il Moris. In moun bien plasé pou kozé, pars sé in moun inportan la-ba dann son péi, é mèm pli loin k’sa, dann l’oséan Indien... Li té apré di, kan l’ariv lèr pou son péi ète indépandan, par l’fète pou l’Anglétèr larg lo péi, pars lété son politik, dé gran savan la vni dann lo péi, zot la pass partou, zot la étidyé bann shif, zot la koz avèk bann kapitalis morisien. Aprésa, zot la fé in "rapor" pou di, Moris lé kondané krèv do fain, i sava konète la guèr sivil, dizon i sava manj galé... pou lo mèm rézon ké lo kozman, moin la di azot, moin la antann dann radio.

Koman i lé l’il Moris zordi ? Koman li lé an parmi bann nasyon indépandan ? Nout tout i koné, é mèm si ni pé dir tout lé pa roz, ni koné lo péi, ziska zordi, la bien débrouy son kari é li la pa anfons dann la kriz konm désèrtin péi l’Erop. L’avnir ? Okin gran dovinèr lé kapab pou prévoir in n’afèr konmsa. Mé zordi, l’èr ni anparl, i pé dir i vo myé viv l’il Moris ké dann l’Island, la Grès, l’Espagn épi d’ot péi ankor. Bann éspésyalis la tronpé pou l’avnir Moris pars, solon nout kouzin morisyen, zot la pa tienbo kont avèk l’om morisyen ; konm i tienbo pa kont avèk l’om rényoné isi La Rényon épi la-ba Paris, bien antandi.

Pars lé bien vré, lé z’om i kont pou bokou sé, pou arpran in kozman bien koni, lo kapital lo pli inportan.

Justin