Mésyé, Médam, La Sosyété alon bate in karé péi L’Afrik avèk bann provèrb. Zordi ni sava dann péi Masaï i fé parti lo gran péi i apèl Kénya. Zot i koné lo zèbr osinonsa zot la fine oir ali par-la dann in park, sansa son foto dann liv zéografI ? Sa in zanimo lé zoli , avèk son bann réyaz blan épi son bann réyaz noir. Sa i rèss kolé avèk li, avèk son po é zamé d’la vi nou la vi in zanimo konmsa apré poz son kouvèrtir a tèr par son prop volonté… sof pétète dann désin animé. Mé lo kozman li mèm, kosa li vé dir ? Pou bann masaï, sa i vé dir ou i rèss konm ou lé, ou i shanj pa out natir. Si in moun lé bon, li lé bon, si li lé mésan, li lé mésan. Li pé fé sanblan mé pou in néstan solman : shass lo natirèl, li rovien gran galo. Alé ! Mi kite azot rofléshi la dsi é ni artrouv pli d’van. Sipétadyé.