Ala i kozman lé vré pou vréman ! Dabor si lo zo té i soutien pa li, la shèr n’oré été k’i shap-shap. Arzout èk sa i fo bien konprann l’om sé in vèrtébré é ki di kolone vèrtébrète i di osi lo zo in pé partou dann nout kor pou la shèr akrosh dési… Sa sé lo sans prop ! Mé le sans lo kozman ? Lo sans lo kozman sé ké nout papa, nout momon, èk out famiy i soutien anou, kan nou na rézon, mèm kan nou na poin rézon toultan. Linz sai i lav an famiy konm i di ! Nana konm in solidarité familyal ! Sa sé in trézor sa kan ou i koné konsèrv ali. Si ou i gingn pa, malèr pou ou pars l’èr-la ou lé konm in bato l’a-poin gouvèrnaye, ou lé konm in toupiye san naye, ou lé pèrdi. Ala ankor in kozman pou zot kass z’ot tète dosi ! Alé ! Ni artouv pli d’van !