Médam, Mésyé, la sosyété, alala kékshoz lé vré é la pa sak i koné in pé l’anatomi va di lo kontrèr. Si kan zot lété lékol zot l’avé in l’ékorshé dann sal de klass, sirman sa sé in n’afèr zot i ansouvien pou d’bon. Zot i rapèl lo misk, lo bann tandon, lo bann zo. L’avé galman in koulèr pou bann zartèr épi in n’ot pou bann vène. Mi arète la pars nou lé pa apré fé in losonn shoz – konm bann vyé zamontrèr téi di. Mé dann lo ka k’i intérèss anou lo zo sé la famiy épi la shèr sé lo zanfan, mèm lo papa, épi lo momon… La famiy i défann lintéré son bann manm-an touléka la plipar d’tan lé konmsa. Sof si néna in gran dézord dann la famiy é dann ka konmsa lé ankor pli mové rant famiy ké rant demoun étranj. Alé ! Mi kite azotpou bien rofléshi la dsi é ni artrouv pli d’van. Sipétadyé !