Médam, zé mésyé, la sosyété, la pa promyé foi mi anparl kozman-la. Si zot i souvien bien li parl la solidarité dann famiy. Néna d’ot i fé galman konm li. Par ébzanp néna in kozman i di : « Domann mon frèr si mwin lé volèr ! » ou lé asiré li va donn amoin in brové d’lav pli blan. Poitan, moin lé konm lé zot moin néna défo, bon épi movèz kalité, é kont pa dsi li pou dévoil mon défo. Moin pèrsonèl, mi trouv sa lé normal mé antansyon : péi lé pti, toulmoun i koné toulmoun, é an parmi l’antouraz nora touzour inn pou konète sak i fo pa konète. Moin la touzour di si mi sava dann in nouvo l’androi, m’a shoizi landroi demoun i koné pa moin, konmsa étan lou, m’a nyabou fé pass amoin pou mouton ; paréssé m’a fé pass amoin pou travayèr, malonète m’a fé pass amoin pou onète. Mé antansyon, in répitasyon i fé é i défé an katriyèm vitèss. Sak zordi i fé kroir li lé blan konm la nèz, domin la nèz fine fond épi mélanz avèk la bou. Alé ! Mi kite azot rofléshi la dsi é ni artrouv pli d’van. Sipétadyé.