Sa osi sé in provèrb La Rényon. Li na konm k’i diré in sans prop épi in sans figiré. Sans prop lé klèr, é la pa bézoin fé in gran tirad la-dsi. Késtyonn sans figiré sa i vé dir par égzanp, in momon i soutien son z’anfan mèm si la na tor : lo zo sé lo momon, la shèr sé lo marmay.

Dann tout péi, dann tout lang nana provèrb konmsa kisoi pou dir ou i pran touzour la défans out moun… kisoi, tazantan, pou dir lo kontrèr. Dann fransé nana : « Tel pèr, tèl fis ! » mé nana osi : « Kan lo pèr lé pirat, lo fis lé prodig ! ».

Kosa zot i anpans de sa ? Arien ditou ! Fé travay z’ot koko ! Fé bouy z’ot matyèr griz ! Zot va oir si rant-rant ni tonm pa tazantan dakor rantre nou. Ni artrouv pli d’van !