A bon ! Konmsa don ? Zot i souvyin kan méssyé Préfé té i jir a nou, la min-déssi-lo kèr, li té apré fé toute sak i fo pou diminyé lo pri l’ésans. Zot i rapèl kan li té apré fé konmsi sété li ki komann, sété li k’i di kèl pri i doi vann l’ésans, lo gaz, gazoil, pétrol : dizon li té i bate lo poin déssi la tab. Kaziman nout protéktèr ! Kaziman nout providans ! In bon pé d’moun té i kroi, kart té dann son min !
Alé oir ! Éstèr, ni koné, li l’avé poin lo bann shif pou byin déside konm k’i fo. Bann pétrolyé té apré boush son zyé : fé pran ali blan pou noir, makaroni pou la bouzi, fromaz pou savon, Gasparin pou Briné. Konm di Zak Prévert, in gran poète dékonèr, té i di : fé prann ali « lo méssie pou in lantèrne ». Zot i kroi sa zot ? Zot i pans banna la boush son zyé pou vréman, sansa li la trouv son plézir la-dan. Mi di, pétète, li lété si tèlman kontan diskite avèk in sosyété i pèz sépa konbyin milyon l’éro, kontan fé l’inportan avèk bann moun inportan, ké li la pa parti rode pli loin. Banna té i ral sèlman déssi bann fisèl, é lo maryonète té k’i dans !
Toute bann missyon la vni issi la di lo préfé la sign zyé fèrmé lo bann pri pétrolyé la désidé. Dann in ka konmsa, kossa in moun fran té i doi fé ? O moin li sign pa, épi si i pous ali tro, li rann son képi. Li la pa rann son képi, li la fé konm si li té lo lavoka bann pétrolyé, li la bate tanbour pou zot. Dizon li té solidèr lo rakétèr bann moun La Rényon. Konm di lo patoi, zot lété « blan boné avèk boné blan », konm lo zo avèk la shèr. Lé byin vré, lo zo i soutyin la shèr !

Justin

L’ésplikasyon inn-dé pti mo :

Kart lé dann son min : sé li k’i déside.

Bate tanbour : fé la piblisité.