Mi di pa sa pou krétiké. Mi di pa sa non pli pou fé lo konéssèr. Mé lé vré ofiramézir bande zané i pass, wi apèrsoi wi koné in pé listoir oute péi mé zamé sifizaman. Mé si o moinss ou téi koné lé baz listoir oute péi naré déza bon, mé souvan défoi ou néna linpréssion wi koné pa sifizaman listoir La Rényon, pa assé antouléka pou bien konprann oute péi, son popilassion, son kiltir, son mantalité.

Astèr lé vré, listoir la pa toute é si wi vé konète oute péi néna ankor bonpé zafèr pou aprande mé d’apré mwin listoir sé déza in gro poin dann la konéssanss noute péi… Mi koné pa si mwin la fine dir azot sa mé konm sa la éspass dovan mon zyé mi pé an parlé san trok langaz..donk na poin lontan, nou téi pass Sin-Lé — kartyé troi lète - dann in kar ; lo Lanimatèr té apré ésplik in bonpé d’shoz. An passan koté la méri Sin-Lé li té apré di ala in magazin kafé dann tan lontan.

Dir ké l’moune té la té étoné, lété pa tro for pars in pé la di zot téi koné pa la Rényon téi plante kafé. Lo tan lo kafé, ala kékshoz lé inportan dann noute listoir ékonomik - ala kékshoz i fo ni koné -antouléka — mé konbien d’moune i koné pa sa ?

Sak mwin lé sir sé ké la pa lékol La Rényon bande zélèv va aprande sa. La pa non pli dann lédikassyon popilèr, pars sa ossi i fé défo koméla. In zour mi panss va bien mète a l’ord-di-zour lékol La Rényon in matyèr va apèl : « Konéssans La Rényon pi loséan indien » é zour-la sar in gran zour sanb pou mwin. Pou noute péi.

Mézami, médam méssyé, la sossyété, si nou néna lokazyon aprande dé shoz dsu nout péi, dsu demoune inportan nout péi, i fo pa ni ézite : i fo ni sézi lokazyon aprande épi lokazyon konète. Sé konmsa ké si zot i vien linivèrsité zédi soir zot va aprande in réyon dsu Louis Timagène Houat, in moune konsékan dann listoir La Rényon.

A bon antandèr, salu !

Justin