Ala in péi - in grande puissans – i trayi toute demoune an mèm tan :

– Zot trayi lo bande péi zot lé alyanssé dann in guèr lokipassion pars kan zot la désside kite l’Afghanistan zot la pa pran l’èr avèk lé zot péi loksidan la akonpagn azot pandan vintan dann in guèr sivil san finission.

– Zot trayi lo gouvernman fantosh zot la mète an plass.
L’ané 2020 laba Doha bande zamérikin la sign in trété avèk bande taliban an déor d’lo gouvèrnman fantosh é san pran l’èr non pli avèk li konm pou dir : « Ala in zéro la gosh in shif li na ka débarbote ali toussèl. » É zot la kontinyé donn larzan gouvèrnman-la konmsi li l’avé ankor in bon l’avnir dann in péi bande taliban téi sava kontrolé.

– Zot trayi in pèp, dyab zot i fé kaziman in pakt avèk lo dyab.
Zot la vni dann l’Afghanistan é zot la propoz lo moune in nouvèl vi, in nouvèl sosyété, in sèrtènn form libérassion avèk pliss lo droi pou bande madame épi bande jenn fiy é sa la pa pèze in grame laba dann Doha kan l’anvi la pran azot lèv zot pou sa négossyé avèk bande taliban.

– Zot trayi bande pèp lokssidan, l’erop épi zétazini, kan zot la di dovan l’opinyon piblik zot téi sava laba pou vanz konte lo térorism épi aporte in lavnir méyèr pou bande moune l’Afghanistan. Zot la di ossi zot i sava ékipe in l’armé afghane é fé do sorte èl lé de forss pou vanze par zot mèm konte bande taliban. Promyé kou d’fiziye banna la détalé.
Toussa an prétan sèrman dsi la bible sansa la min a la plass lo kère.

– Zot trayi bande jenn la parti fé la guère dann lo péi épi la trouv la mor épi toute kalité landikape. Téi falé vréman toute so bande viktime koté oksidantal ?
Toussa pou trouv kossa vintan apré ? In kantité d’moune i vé arienk sov zot péi. Dë mouvman intégrist épi térorist la fine komanss bataye pou oir kissa i sava ranporte la mize-Daesh sansa Taliban, Inn pli pire ké l’ote avèk l’amérik konm shèf dann lorkèst. Ki sé domin va sèye ansèrv banna konte bande shinoi épi bande russ é sa san di ouvèrtman.

Koman i pé apèl in n’afèr konmsa ? Trayizon ! Mé sa i sifi pa. i pé mète ossi lo mo franssé « duplicité » mé ossi foutaz dé guèl an zénéral, san pityé – pou mon par mi wa tré bien sa konm in lantropriz kriminèl d’éta.

San konté la konplissité pou toute lokssidan é la konplissité i dédouane pa zot.