Mézami lonèkté i vé pa dir la mèm shoz dann la lang kréol épi dann la lang franssé : i pé di sa bann fo zami sa, ranté lé dê lang ! Lonèkté an kréol sé la politèss, an franssé sé « l’honnèteté ». In moune onète dann la lang kréol sa i vé dir in moune poli ; in moune « honnète »dann franssé sé lo kontrèr d’in moune « malhonnête ».

Astèr si ni rovien dsi sak nou la marke an-o la : lonèkté i vann pa, é i ashté pa la boutik. Sé in kalité ké wi aprann avèk oute famiye, avèk oute métrèss lékol, osinonsa avèk banndame katéshiss... Wipé aprann galman si wi viv an parmi l’moune ohète. Ni pé di par ébzanpe : « Lonèkté lé né avan nou » é sa lé vré pou vréman, konm lé vré l’obligassion aplike ali konm li lé.

Alé ! mi kite azot rofléshi la dsi é ni rotrouv pli d’van, sipétadyé.

Justin